मोरक्कोलाई हराउँदै क्रोएसिया विश्वकपमा तेश्रो

दोहा, ३ पुस– फिफा विश्वकप–२०२२ मा क्रोएसिया तेस्रो भएको छ ।

कतारको राजधानी दोहास्थित खालिफा अन्तर्राष्ट्रिय मैदानमा शनिबार भएको खेलमा अफ्रिकन टोली मोरक्कोलाई २–१ गोलले पराजित गर्दै क्रोएसियाले तेस्रो स्थान पक्का गरेको हो ।

क्रोएसिया यसअघि सन् २०१८ को विश्वकपमा उपविजेता भएको थियो । क्रोएसियाले खेलको सातौं मिटेनमै १–० को अग्रता लिएको थियो । क्रोएसियाका लागि जोस्को ग्भार्डिओलले पहिलो गोल गरे ।

तर, त्यसको दुई मिनेटमै मोरक्कोका लागि अर्चरफ डारीले गोल गर्दै खेललाई बराबरी गरे । खेलको ४२औं मिनेटमा क्रोएसियाका लागि मिस्ला ओरसिकले डिबक्स बाहिरबाट गरेको प्रहार गोलमा परिणत भयो । मोरक्को चौथो भएको छ ।

मोरक्कोले विश्वकपमा सेमिफाइनलमा पुग्ने पहिलो अफ्रिकन टोलीको रेकर्ड बनाएको छ । क्रोएसियाले तेस्रो उपाधिसहित २७ मिलियन डलर जितेको छ । चौथो स्थानको मोरक्कोले २५ मिलियन डलर पाएको छ ।

विश्वकप–२०२२ को उपाधि भिडन्त आजै हुँदैछ । उपाधिका लागि अर्जेन्टिना र अघिल्लो संस्करणको विश्वकप विजेता फ्रान्स भिड्ने छन् । खेल
नेपाली समयअनुसार राति ८ः४५ मा हुनेछ । सेमिफाइनलमा फ्रान्सले मोरक्को र अर्जेन्टिनाले क्रोएसियालाई हराएका थिए ।