- बुधबार, ६ साउन, २०८३
काठमाण्डु, २२ असोज–आज पनि देशका विभिन्न स्थानमा पानी पर्ने भएको छ ।
जल तथा मौसम विज्ञान विभागअन्तर्गतको मौसम पूर्वानुमान महाशाखाले कोशी, मधेश, बागमती प्रदेश, गण्डकी र लुम्बिनी प्रदेशमा मनसुनी वायुको प्रभाव रहेको जनाएको छ । कर्णाली प्रदेश र सुदूरपश्चिम प्रदेशमा भने मनसुन करिब बाहिरिइसकेको छ ।
देशको पूर्वी र मध्य भागमा भारतको बिहार तथा आसपासको क्षेत्रमा रहेको न्यूनचापीय प्रणालीको आंशिक प्रभावसमेत छ ।
बिहानदेखि पहाडी भू–भागका केही स्थानमा वर्षात भइरहेको छ ।कोशी र बागमती प्रदेशका एक वा दुई स्थानमा हल्का वर्षा भइहेको छ ।
दिउँसो कोशी, मधेस, बागमती र गण्डकी प्रदेशमा आंशिकदेखि साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहने अनुमान विभागले गरेको छ ।
कोशी, मधेस, बागमती र गण्डकी प्रदेशका थोरै स्थानहरूमा तथा बाँकी प्रदेशका पहाडी भू–भागका एक–दुई स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ ।
राति कोशी, मधेस, बागमती र गण्डकी प्रदेशमा आंशिकदेखि साधारणतया बदली रहनेछ । बाँकी भू–भागमा आंशिक बदलीदेखि मौसम मुख्यतया सफा रहने छ ।
