- मंगलबार, २४ असार, २०८२
काठमाण्डु, १२ असोज– ललितपुरको नख्खु खोलाले बगाएका चारमध्ये तीन जनाको जिवितै उद्धार भएको छ ।
ललितपुरको महानगरपालिका–२५ सुगम बस्ती नख्खुडोलस्थित एक टहरोको छतमा बसेका बेला उनीहरुलाई बाढीले बगाएको थियो ।
उद्धारका लागि रोइकराई गराउँदा गराउँदै उनीहरुलाई बगाएको भिडियो र तस्बिर सामाजिक सञ्जालमा भाइरल बनेको छ । दुई जनालाई काभ्रेको तेमाल गाउँपालिका–९ का चणिकलाल तामाङले उद्धार गरेका थिए ।
बाबुछोरी सँगै बगेका थिए । राजुले छोरीलाई समतेर बग्दै गरेको देखेपछि तामाङले खोलामा हाम फालेर उनीहरुलाई बाहिर निकालेका हुन् ।
एक जनाले भने पौडिएर ज्यान बचाएका छन् । एक जनाको अवस्था भने अज्ञात छ । उनीहरु तीनै जनाको पाटन अस्पतालमा उपचार भइरहेको छ ।
ललितपुर प्रहरीका अनुसार रौतहट घर भई सुगम बस्तीमा बस्दै आएका ४३ वर्षीय राजु साह र उनकी छोरी ६ वर्षीया मेघनालाई चणिकलालले उद्धार गरेका हुन् ।
राजुका भाइ २२ वर्षीय राज साहले पौडिएर ज्यान बचाए । राजुकी छोरी ४ वर्षीया सेर्तुको अवस्था अज्ञात छ ।
