- शुक्रबार, २२ जेठ, २०८३
काठमाण्डु, २३ भदौ– क्रिकेट खेल्ने सिलसिलामा मुलुकबाहिर रहेका बलात्कार आरोपी नेपाली राष्ट्रिय क्रिकेट टिमका कप्तान सन्दीप लामिछानेले नेपाल क्रिकेट संघ (क्यान) ले तत्काल नेपाल फर्कन दिएको निर्देशन अस्वीकार गरेका छन् ।
क्यान सचिव प्रशान्तविक्रम मल्लले लामिछानेलाई आरोप लागेपछि नेपाल आउन भनेकामा उनले खेल सकाएर मात्र फर्कने जवाफ दिएको बताए । क्यानले आरोप लागेकाले बीचैमा आउन भनेको थियो’, मल्लले भने, उहाँले म्याच सकेर मात्र फर्कन्छु भन्नुभएको छ ।’ ६ भदौमा नेपाली टिमको नेतृत्व गर्दै तीन र पाँच टि–२० खेल्न केन्या गएका लामिछाने उतैबाट क्यारेबियन प्रिमियर लिग (सीपीएल) खेल्ने सिलसिलामा वेष्ट इन्डिजको जमैकामा छन् ।
आफूलाई केन्या जानु अघिल्लो दिन एयरपोर्टको एक होटलमा लगेर लामिछानेले रातभर जबर्जस्ती करणी गरेको भन्दै १७ वर्षीया किशोरीले मंगलबार गौशाला प्रहरीमा जाहेरी दिएकी थिइन् । प्रहरीले लामिछानेलाई पक्राउ अनुमति मागेकामा काठमाण्डु अदातले बिहीबार पक्राउ पुर्जी जारी गरेको छ ।
लामिछानेले क्यान पदाधिकारीसँग जमैकाबाटै टेलिफोनमा कुरा गर्दै बलात्कारको आरोप अस्वीकार गरेका छन् । आफू कानूनी उपचारमा जाने भन्दै लामिछानेले त्यसका लागि क्यानको सहयोग मागेका छन् । लामिछानेलाई निलम्बनको तयारी गरेको क्यान अन्तिम समयमा आएर पछि हटेको छ । सचिव मल्लले कानूनी रुपमा अभियोग प्रमाणित नभएसम्म लामिछानेमाथि निलम्बनलगायत कुनै पनि कारबाही नगरिने स्पष्ट गरे ।
