- शनिबार, २९ मंसिर, २०८१
काठमाण्डु, ३ कात्तिक– नेपाल राष्ट्र बैंकले मंगलबार परिपत्र जारी गर्दे निक्षेपको उच्च ब्याददरमा लगाएको अंकुशको प्रभाव नेप्सेमा देखिन थालेको छ । राष्ट्र बैंकले अघिल्लो दिन वाणिज्य बैंक, विकास बैंक र फाइनान्स कम्पनीहरुको नाममा परिपत्र जारी गर्दे निक्षेपको ब्याजदरलाई १० प्रतिशतम्ममा निर्धारण गर्न निर्देशन दिएको थियो ।
उक्त निर्देशनको प्रभाव साताको चौथो दिन अर्थात आज बुधबारको सेयर कारोबारमा देखिएको छ । अघिल्ला दिनहरुमा लगातार उच्च अंकले घट्दै आएको नेप्से आज बुधबार ६० दशमलव ५६ अंकले बढेर २५ सय ७१ दशमलव ६६ अंकमा पुग्दा सेन्सिटिभ इन्डेक्स पनि १२ दशमलव नौ अंकले बढेर चार सय ८४ दशमलव पाँच अंकमा पुगेको छ ।
दुई सय १७ वटा कम्पनीहरुकहो ३४ हजार छ सय ४४ पटकको कारोबारमा ६१ लाख एक हजार चार सय १४ कित्ता सेयर किनबेच हुँदा कुल कारोबार रकम दुई अर्ब ६७ करोड ९० लाख २८ हजार एक सय ५५ रुपैयाँ पुगेको छ ।
१३ वटा समूहको कारोबार भएकोमा आज १३ वटै समूहहरुको सूचक बढेर नेप्से पुरै हरियो भएको छ । सोमध्ये वाणिज्य बैंक समूहको सूचक ३२ दशमलव ६२ अंकले बढेर १८ सय छ दशमलव ४० अंकमा पुग्दा निर्जीवन बिमा समूहको सूचक पनि दुई सय ४८ दशमलव एक अंकले बढेर ११ हजार पाँच सय तीन दशमलव १९ अंकमा पुगेको छ ।
जीवन बिमा समूहको सूचक पनि एक सय ८९ दशमलव ६९ अंकले बढेर १४ हजार चार सय ५२ दशमलव ५२ अंकमा पुग्दा विकास बैंक, जलविद्युुत फाइनान्स, ट्रेडिङ, होटेल तथा पर्यटन, उत्पादनमुलक, अन्य, लघुवित्त, सामूहिक लगानी कोष र लगानी समूहहरुको सूचक पनि उच्च अंकले बढेका छन् ।
नेप्सेमा आज मैलुङ खोला जलविद्युत कम्पनीको प्रतिकित्ता सेयर मूल्य १० प्र्रतिशतले बढेर चार सय २२ रुपैयाँ ४० पैसामा प्रतिकित्ता सेयर कारोबार हुँदा एभरेष्ट इन्स्योरेन्स कम्पनीको संस्थापक सेयरको मूल्य चार दशमलव ९६ प्रतिशतले घटेर तीन सय ५८ रुपैयाँमा कारोबार भएको छ ।
