टिकापुर घटनाः रेशम चौधरी र लक्ष्मण थारुसहित ८ जनालाई २० वर्ष कैद

डोटी, ३ पुस– उच्च अदातल दिपायलले टिकापुर नरसंहारमा दोषी ठहर गर्दै कैलाली–१ बाट निर्वाचित संघीय सांसद रेशम चौधरीलाई जन्मकैदको सजाँय सुनाएको छ ।

न्यायाधीसद्वय टेकनारायण कुँवर र सीताराम मण्डलको संयुक्त इजलासले बिहीबार चाधरीसहित ८ जनालाई जन्मकैदको फैसला सुनाएको हो । जन्मकैदको फैसला सुनाइएका अन्यमा थरुहट आन्दोलनका नेता लक्ष्मण थारु, हरिनारायण चौधरी, प्रदीप चौधरी, वीरबहादुर चौधरी, राजेश चौधरी, सीताराम चौधरी र गंगाराम चौधरी रहेको उच्च अदालत दिपायलकी रजिष्ट्रार सिता रेग्मीले बताइन् । लक्ष्मण थारुलाई यसअघि कैलाली जिल्ला अदालतले तीन वर्षको कैद सजाँय सुनाएको थियो ।

तर, उक्त अवधि पुर्पक्षमै बिताएकाले अदालतको फैसलालगत्तै उनी रिहा भएका थिए ।  जिल्ला अदालत कैलालीका न्यायाधीश परषुराम भट्टराईको इजलासले २०७५ फागुन २२ गते रेशमसहित १० जनालाई जन्मकैदको फैसला सुनाएको थियो । उक्त फैसलामा असहमति जनाउँदै रेशम चौधरी सहिततले उच्च अदालतमा पुनरावेदनको निवेदन दिएका थिए ।

थारु आन्दोलनका क्रममा २०७२ भदौ ७ गते कैलालीको टीकापुरमा आन्दोलनकारीको आक्रमणमा एसएसपी लक्ष्मण न्यौपानेसहित नेपाल प्रहरीका ८ र एक नाबालकको ज्यान गएको थियो ।