- शुक्रबार, ७ वैशाख, २०८१
काठमाण्डु, १५ कात्तिक – उपप्रधानमन्त्री एवम् संघीय मामिला तथा स्थानीय विकासमन्त्री प्रकाशमान सिंहले दलहरुका बिच विवादित विषयमा शनिबार सहमतिको लागि अधिक प्रयास गर्ने सहमति नभए प्रक्रियामा गएर भएपनि माघ ८ मै संविधान जारी गर्ने बताएका छन् ।
शनिबार रेडन कलेजले १७ औं एसियाडमा नेपालका लागि एक मात्र कास्य पदक दिलाउन सफल खेलाडी विमला तामाङ्लाई सम्मान गरेको कार्यक्रममा उपप्रधानमन्त्री सिंहले विवादित विषयमा सहमती जुटाउन आजको दिन निर्णायक भएको भन्दै सकेसम्म सहमतीको लागि प्रयास गर्ने सहमती हुन नसके प्रक्रियामा गएर पनि मुलुकलाई माघ ८ मै संविधान दिने बताएका छन् ।
कार्यक्रममा नेपालका लागि १७ औं एसियाडमा एक मात्र कास्य पदक दिलाउन सफल खेलाडी विमला तामाङ्लाई नगद ५० हजार सहित सम्मान गरिएको थियो । विमला रेडन कलेजमै कक्षा ११ मा अध्ययनरत छिन् । उनका प्रशिक्षक ध्रुवविक्रम मल्ललाई पनि सम्मान गरिएको छ ।
त्यस्तै उच्च माध्यमिक शिक्षा परिषदका निमित्त सदस्य सचिव नारायणप्रसाद कोइराला, रेडन स्कुल तथा कलेजका प्रबन्ध निर्देशक बुद्धिप्रसाद पुडासैनी, रेडन स्कुल तथा कलेजका प्रिन्सीपल प्रा.डा. देविदत्त पौड्याल लगायतले विमलालाई बधाई तथा शुभकामना दिएका थिए ।
