बारा, ३ चैत – श्रीमती पाल्न छोरो विदेशिएका बेला परपुरुषसँग यौन सम्बन्ध राखेको भेटिएपछि बारामा ससुराले बुहारीलाई प्रहरीमा बुझाएका छन् ।
सिमराकी ती महिलालाई गाउँकै एक युवकसँग घरमै यौन सम्बन्ध राखिरहेको अवस्थामा भेटाइएपछि रातभर कोठामै थुनेर सोमबार उनीहरुलाई इलाका प्रहरी कार्यालय सिमरामा बुझाइएको छ ।
हेटौँडा माइती भई सिमरामा विवाह गरेर आएको केही महिनापछि श्रीमान विदेशिएको र केही महिनायता परपुरुषसँग प्रेम सम्बन्धमा रहँदै आएको ती महिलाले बताएकी छिन् ।
दुबैलाई प्रहरीमा बुझाएपछि स्थानीय र माइती पक्षसमेत प्रहरी कार्यालयमा पुगेका थिए । घरपरिवारले अस्वीकार गर्ने भए माइतीमा बस्न आमाले गरेको आग्रहलाई ती महिलाले अस्वीकार गर्दै त्यही युवकसँग जीवन बिताउने बताइन् ।
‘हामी एक अर्कालाई माया गछौं,’ प्रहरी कार्यालयमा सहमति पत्रमा हस्ताक्षर गर्दै त्यस युवकले भने, ‘अब हामी दाम्पत्य जीवनमा बाँधिन सहमति जनाउँछौं ।’
आफूले प्रेम गरेकाले श्रीमतीको रुपमा स्वीकार गर्ने र तिनले पनि आफूसँग बस्न चाहेको त्यस युवकले बताए । ती महिलाको अहिलेसम्म सन्तान भएको छैन भने युवक पनि अविवाहित हुन् ।
‘केटाकेटीबीच नयाँ जीवन सुरु गर्ने सहमति भयो,’ प्रहरी निरीक्षक जयराम कुईंकेलले भने, ‘ससुराको सहमतिमा पुरानो सम्बन्ध विच्छेद र नयाँ सम्बन्धलाई वैधता दिने सहमति भयो ।’