विराटनगर, १ चैत – राष्ट्रिय प्रजातन्त्र पार्टी नेपालका अध्यक्ष कमल थापाले स्थानीय निकायको निर्वाचन अहिलेको प्रमुख आवश्यकता भएको बताएका छन् ।
विराटनगरमा शनिबार आयोजित पत्रकार सम्मेलनमा बोल्दै थापाले स्थानीय चुनावले संघीयतालाई बलियो बनाउने बताए ।
नेपाली काँग्रेस र एमाले स्थानीय निकायको निर्वाचनप्रति गम्भीर नभएको भन्दै उनले निर्वाचन हुनेमा आशङ्का व्यक्त गरेका छन् ।
साथै उनले राष्ट्रपति र उपराष्ट्रपतिको निर्वाचन गर्नुपर्नेमा जोड समेत दिएका छन् ।
‘संविधानसभाले राष्ट्रपति र उपराष्ट्रपतिको निर्वाचन गर्नुपर्छ भन्ने संवैधानिक व्यवस्था छ,’ थापाले भने, ‘काँग्रेस–एमालेबीच भएको सात बुँदे सहमतिले उक्त विषयलाई समाप्त पार्ने काम भयो ।’
संविधानसभाले ताजा जनादेश पाइसकेको हुँदा राष्ट्रपति र उपराष्ट्रपतिको निर्वाचन हुनुपर्ने उनको भनाइ छ ।