काठमाण्डु, २८ फागुन – नेकपा–माओवादीका उपाध्यक्ष सीपी गजुरेलले औचित्य पुष्टि गरेर हतियार उठाउने चेतावनी दिएका छन् ।
सिन्धुलीको आठौं जिल्ला सम्मेलनको निर्णय सार्वजनिक गर्न बुधबार सिन्धुलीमाडीमा आयोजित कार्यक्रममा बोल्दै गजुरेलले औचित्य पुष्टि गरेर हतियार उठाउने बताएका हुन् ।
जनसंविधान निर्माणका लागि जस्तोसुकै कदम चाल्न पनि तयार रहेको उनको भनाइ छ । आफूहरुले सडकबाटै संविधान जारी गर्ने भन्दै गजुरेलले मुलुकमा दुईवटा संविधान जारी हुने अवस्था आएको दावी गरे ।
आफ्नो पार्टीलाई भूमिगत बनाउन अन्य दलहरु लागि परेको आरोप लगाउँदै गजुरेलले तत्काल भूमिगत नहुने संकेत गरे ।
राष्ट्रिय स्वाधिनता, जनजीविका र जनसंविधानका लागि आन्दोलनको आँधीबेहरी ल्याउने भन्दै गजुरेलले आगामी चैत २४ गते आन्दोलन घोषणा गर्ने जानकारी दिएका छन् ।