- शनिबार, ८ वैशाख, २०८१
तेह्रथुम, २७ फागुन – टर्वाइनमा खराबी आएपछि आठ्ठराई ह्वाकूको चियाखोला लघुजलविद्युत् परियोजनामा दुई सातादेखि विद्युत् अवरुद्ध भएको छ ।
विद्युत् उत्पादन नहुँदा ह्वाकू १, २ र ४ का २४० घरधुरी अन्धकारमा परेका छन् । टर्वाइनको डायर जलेपछि फागुन १२ गतेदेखि विद्युत् उत्पादन अवरुद्ध भएको चियाखोला लघुजलविद्युत् परियोजनाका सदस्य बलमायाँ गुरुङले बताईन् ।
विद्युत् अवरुद्ध हुँदा आसन्न एसएलसी परीक्षाको तयारीमा रहेका विद्यार्थी सबैभन्दा बढी मारमा परेका छन् । उपभोक्ता समितिसँग पैसा अभाव भएकाले नयाँ डायर खरिदका लागि समस्या भइरहेको गुरुङको भनाइ छ ।
पैसा जुटे पनि डायर खरिदका लागि बुटवल पुग्नुपर्ने भएकाले विद्युत् सुचारु गर्न अझै केही दिन लाग्ने परियोजनाले जनाएको छ ।
२० किलोवाट क्षमताको उक्त लघुजलविद्युत् जिविस/ग्रामीण ऊर्जा विकास कार्यक्रमको सहयोग र उपभोक्ताहरुको लगानी तथा जनश्रमदानमा छ वर्षअघि निर्माण भएको थियो ।
