काठमाण्डु–एकीकृत माओवादी नेता बाबुराम भट्टराईले राष्ट्रिय सम्मेलनलाई राजनीतिक र संगठनात्मक कार्यदिशामा बनाउने थलो बनाउन अध्यक्ष पुष्पकमल दाहाल प्रचण्डलाई दबाब दिने रणनीति बनाएका छन । गत माघ २ देखि १८ गतेसम्म काठमाण्डुमा बसेको एमाओवादी केन्द्रीय समिति बैठकले आगामी वैशाख १८ गते राष्ट्रिय सम्मेलन गर्ने निर्णय गरेको थियो ।
आफू पक्षधर करिब ३० जना नेताहरुलाई आइतबार आफ्नै निवास सानेपामा भेला गरी भट्टराईले त्यसबारे छलफल गरेका छन । जिल्ला संयोजकहरुले पार्टी मुख्यालय पेरिसडाँडामा शुक्रबार र शनिबार भएको भेलापछि भट्टराईले आइतबार आफू पक्षधर नेताहरुलाई आफनै निवासमा बोलाएर छुट्टै छलफल गरेका हुन ।
भेलामा सहभागी एक नेताका अनुसार पूरानो पुस्ताको नेतृत्वले जनवादी क्रान्तिको नेतृत्व गरेको र समाजवादी क्रान्तिको नेतृत्व गर्न नयाँ पुस्तालाई साँगठनिक नेतृत्व हस्तान्तरण गरी आफूहरुले वैचारिक नेतृत्व गर्नु पर्ने धारणा पनि उनले व्यक्त गरेका छन । चक्रिय अध्यक्षात्मक प्रणाली अवलम्बन गरेर नेतृत्व विकास गर्न सकिने विकल्प पनि भट्टराईले अगाडि सारेको ती नेताले बताए ।
भेलामा टोपबहादुर रायमाझी,देवेन्द्र पौडेल,नवराज सुवेदी,हिसिला यमी,गंगा श्रेष्ठ लगायतका नेता सहभागी थिए । भेलामा नेता राम कार्की र कुनै पनि सभासद सहभागी थिएनन् । भट्टराईको भनाइ उदृत गर्दै ती नेताले भने ‘विचारको आधारमा संगठन निर्माण गर्नुपर्छ त्यसका लागि राजनीतिक र वैचारिक प्रष्टता खोजेर मात्रै संगठनात्मक विधि बनाइनुपर्छ ।’ पार्टीलाई रुपान्तरण गरी नयाँ शक्तिको रुपमा विकास गरिनु पर्ने भट्टराईले बताएका थिए ।
‘नेतृत्व भनेको पाको वा कपाल फुलेकै हुनुपर्छ भन्ने पनि होइन । परिवर्तन गर्ने विश्वका नेताहरु पनि ४० वर्ष आसपासका नै छन् । त्यसरी नै हामी कहाँ पनि त्यही उमेर आसपासका नेताहरु नै आउन सक्छन । अथवामा पूरानै मध्येबाट कसैले युगको आवाज सुनेर आफूलाई रुपान्तरण गर्न पनि सक्छन’ भट्टराईले आइतबार प्रकाशित नेपाल साप्ताहिकमा ६ पृष्ठ लामो लेखमा लेखेका छन ।
नेपाली समाज नयाँ चरणमा प्रवेश गरिसकेको छ । अब त्यसलाई नेतृत्व गरेर जानका निम्ति आफनो संगठन,नेतृत्व र कार्यशैलीलाई नै परिवर्तन गरेर लैजान सक्नु पर्छ । त्यसो गर्न सकिएन भने नयाँ शक्तिको उदय हुन्छ र त्यसलाई कसैले रोक्न सक्ने छैन ।’