काठमाण्डु ८ फागुन–एकीकृत माओवादीका बरिष्ठ नेता डा बाबुराम भट्टराईले गृहमन्त्रालयका बारेमा काँंग्रेस र एमाले वीचको विवाद मिलाउने जिम्मेवारी प्रधानमन्त्री सुशील कोइरालाको हातमा रहेको बताएका छन ।
सामाजिक सञ्जाल फेसबुक मार्फत बिहिबार राती सार्वजनिक आफनो अभिमतमा नेता भट्टराईले त्यस्तो धारणा व्यक्त गरेका हुन ।
‘प्रधानमन्त्री निर्वाचित भइसकेपछि अव बल सुशील कोइरालाजीको हातमा छ। उहाँले आफनो नेतृत्व क्षमता देखाउनु पर्छ’पूर्व प्रधानमन्त्री समेत रहेका नेता भट्टराईले भनेका छन ‘दुइ पटक सरकारको नेतृत्व गर्दा एमाओवादीले गृहमन्त्रालय लिएन । तर अहिले काँग्रेस र एमाले गृहमन्त्रालय नपाए आकाशै खस्ने जुन कुरा गरिरहेका छन त्यो बुझिनसक्नु भएको छ ।’
एमाओवादीका तर्फबाट भट्टराई र अध्यक्ष पुष्पकमल दाहाल प्रचण्डले नेतृत्व गरेका दुईवटा सरकार बनेका थिए । प्रचण्ड नेतृत्वको सरकारमा एमालेका उपाध्यक्ष बामदेव गौतम गृहमन्त्री थिए भने भट्टराई नेतृत्वको सरकारमा मधेशी जनअधिकार फोरम लोकतान्त्रिकका अध्यक्ष बिजयकुमार गच्छादार गृहमन्त्री थिए ।
आफनो पार्टी राष्ट्रिय सहमतिको सरकार बाहेक अरु कुनै पनि सरकारमा अहिले सहभागी नबन्ने र बन्न नहुने धारणा पनि भट्टराईले व्यक्त गरेका छन । ‘अरु सबै अनुमान र हल्ला निराधार हुन’भट्टराईले भनेका छन ।