काँग्रेस निर्णयको पूर्ण पाठ यस्तो छ

प्रेस विज्ञप्ति

फागुन ५, २०७०

नेपाली कांग्रेसका सभापति एवं सम्माननीय प्रधानमन्त्री सुशील कोइरालाज्यूको अध्यक्षतामा नेपाली कांग्रेस संसदीय समितिको बैठक पार्टीको केन्द्रीय कार्यालय, बी.पी. स्मृति भवन, बी.पी. नगर, ललितपुरमा आज बस्यो । संसदीय समितिको बैठकले देहायको निर्णय गरेको छ । १. नेपाली कांग्रेसका सभापति श्री सुशील कोइराला र नेकपा (एमाले) का अध्यक्ष श्री झलनाथ खनाल बीच मिति २०७० माघ २६ मा भएको ७ वुँदे सहमतिलाई यो बैठक अनुमोदन गर्दछ । सो सहमतिमा समावेश वुँदाहरुको कार्यान्वयनमा प्रतिवद्ध रहँदै भोलि फाल्गुण ६ गते हुन लागेको संविधानसभा अध्यक्ष/व्यवस्थापिका संसद सभामुख पदका लागि नेकपा (एमाले) का उम्मेदवारलाई समर्थन गर्ने निर्णय गर्दछ । साथै, सहमति पत्रको सातौँ वुँदाप्रति ध्यानाकर्षण गर्दै मन्त्री परिषद्‌मा अविलम्व समावेश हुने अग्रसरता लिन नेकपा (एमाले) लाई आग्रह गर्दछ ।

२. हिजो नेपाल एयरलाइन्सको ट्विनेटर विमान दुर्घटना र त्यसमा रहेका चालक दल एवं यात्रुहरुको अज्ञात अवस्था बारे यो बैठक गहिरो चिन्ता व्यक्त गर्दछ र सो दुर्घटनाको अविलम्व खोजतलास र उद्धार कार्यका लागि सरकारलाई अनुरोध गर्दछ ।

३. नेपाली कांग्रेस झापाका पूर्व सांसद श्रीमती चेतकुमारी दाहालको असामयिक निधनप्रति यो बैठक गहिरो दुःख प्रकट गर्दै शोक सन्तप्त परिवारमा हार्दिक समवेदना व्यक्त गर्दछ ।

प्रदीप पराजुली

सचिव