- शुक्रबार, १४ वैशाख, २०८१
उदयपुर, २२ मंसिर– प्रहरीले उदयपुरको पश्चिमी पहाडी गाविस तथा मध्य पहाडी गाविसमा लगायएका अवैध गाँजा खेती नष्ट गरेको छ ।अभियानका क्रममा ६ सय २६ रोपनी जग्गामा लगाइएको गाँजा खेती नष्ट गरेको हो ।
मंसिर १४ गतेबाट इलाका प्रहरी कार्यालय कटारीको टोली र सशस्त्र प्रहरीको टोलीले जिल्लाको पश्चिमी भेगका पहाडी गाविसहरु इनामे, रुपाटार, ठानागाउँ, ओख्ले, लेखगाउँ लगायतका गाविसमा नेपाल प्रहरी तथा सशस्त्र प्रहरीको टोली पठाएर अवैध गाँजा खेती फँडानी गरेको थियो ।
यस्तै सदरमुकाम गाईघाटबाट जिल्ला प्रहरी कार्यालयको प्रहरी टोली तथा सशस्त्र प्रहरी टोलीले जिल्लाको मध्य पहाडी गाविस भुटार र ठानागाउँ क्षेत्रमा पनि गाँजा फँडानी गरेको छ ।
जिल्लाका पहाडी भेगका गाविसमा धेरै गाँजा खेती रहेको प्रहरी प्रमुख अजय भट्टराईले बताए । उदयपुरमा गत वर्ष पनि प्रहरीले पाँच हजार रोपनी जग्गा बराबरको अवैध गाँजा खेती नष्ट गरेको थियो ।
