जन्ती बोकेको बस पल्टिँदा ३३ घाइते

दमौली, २२ मङ्सिर–तनहुँको पुर्कोट–३ बडहरेमा जन्ती बोकेको एउटा बस शुक्रबार राति सडक छेउमा पल्टिँदा ३३ जना घाइते भएका छन् भने दुई जना गम्भीर रहेका छन् ।
चितवनबाट जन्ती लिएर बेसी सहर जाँदै गरेको ग १ ख ४५१२ नंको बस दुर्घटनामा परी गम्भीर घाइते हुनेमा रुपाकोट–४ का ७० वर्षीय छविराम परियार र लम्जुङ भोटेवडार–८ की १६ वर्षीय रेनुका परियार रहेका छन् । घाइतेमध्ये १२ जनाको भरतपुर मेडिकल कलेज चितवन र २१ जनाको लमजुङको बेसी सहरमा उपचार भइरहेको जिल्ला प्रहरी कार्यालय तनहँुले जनाएको छ ।
बसमा ५५ जना थिए । क्षमताभन्दा बढी यात्रु र तीव्र गतिका कारण बस अनियन्त्रित भई दुर्घटनामा परेको बताइएको छ । बस चालकलाई नियन्त्रणमा लिई थप अनुसन्धान भइरहेकोे छ । रासस