- शनिबार, ७ असार, २०८२
काठमाण्डू, ७ असार– नेकपा एकीकृत समाजवादीका सांसद् किसानकुमार श्रेष्ठले काँग्रेस सभापति शेरबहादुर देउवाको गृह जिल्ला डडेल्धुरामा तीन करोडभन्दा माथिका ७५ वटा योजना राखिएकामा आपत्ति जनाएका छन् ।
आर्थिक वर्ष ०८२/०८३ का लागि विनियोजित बजेटमाथि प्रतिनिधिसभामा खर्च कटौतीको प्रस्तावमा बोल्दै शनिबार उनले बजेट आवश्यकताका आधारमा नभई प्रधानमन्त्री र मन्त्रीहरुका निर्वाचन क्षेत्रमा बजेट खन्याइएको आरोप लगाए ।
मनपरी ढंगले बजेट विनियोजन हुँदा पनि सत्ता पक्षका सांसदहरु बोल्न नसकेको उनले बताए । यद्यपि कोही पनि सांसद विनियोजनप्रति सन्तुष्ट नरहेको श्रेष्ठको भनाइ थियो ।
‘पार्टीले कोर्रा हिर्काउने डरले सत्तापक्षका माननीयहरु बोल्न सक्नुभएन’, श्रेष्ठले भने, ‘प्रधानमन्त्री र मन्त्रीहरुले बजेट धेरै हालेपछि ०८४ मा चुनाव जितिन्छ भन्ने ठान्नुभएको होला ।
देशको ढुकुटी दुरुपयोग गर्नेलाई जनताले छानीछानी हराउँछ ।’ उनले आफ्नो निर्वाचन क्षेत्रमा मात्र बजेट खन्याउने मन्त्रीहरुलाई आफूसँग चुनाव लडेर हराउन चुनौती दिए ।
