- मंगलबार, २७ जेठ, २०८२
काठमाण्डू, २६ जेठ– अमेरिकाबाट डिपोर्ट भएर काठमाण्डू आएका ३७ जनामध्ये एक जना डिभी भिसामा अमेरिका गएका व्यक्ति रहेको खुलेको छ । १० वर्षअघि डीभी परेर गएका ती व्यक्ति अमेरिकाको टेक्सास राज्यमा बस्दै आएको खुलेको अध्यागमन विभाग स्रोतले जानकारी दिएको छ । एक जना आफन्तसँग बसिरहेका उनी त्यहाँ पारिवारिक विवादमा परेका थिए ।
त्यसक्रममा उनलाई प्रहरीले पक्राउ गरेर लगेको थियो । केही समयको अनुसन्धान अनि कानुनी प्रक्रियापछि उनलाई अमेरिकी प्रशासनले डिपोर्ट गर्ने निर्णय गरेको थियो । त्यसपछि काठमाण्डू स्थायी घर भएका उनलाई चार्टर्ड विमानमा काठमाण्डू पठाइएको थियो । काठमाण्डू आएपछि उनीसँग मानवबेचबिखन अनुसन्धान ब्यूरोका अधिकारीहरूले समेत संक्षिप्त सोधपुछ गरेका थिए ।
‘तर डीभी परेर गएको भनेपछि हाम्रो धेरै सरोकारको केश भएन’, एक अधिकारीले भने, ‘सामान्य विवरण टिपेर पठाइदिएका थियौं ।’ अध्यागमन विभागका महानिर्देशक गोविन्द रिजालका अनुसार, अमेरिकाबाट डिपोर्ट भएर आइतबार ३७ जना काठमाण्डू आएका थिए । तीमध्ये ५ जना महिला थिए । उनीहरूलाई एरिजोना राज्यबाट ओम्नी एयर इन्टरनेशनलको विमानमा फिर्ता पठाइएको थियो ।
उनीहरुलाई ढाका हुँदै काठमाण्डू ल्याइएको थियो । प्रहरीले उनीहरूसँग अवैध बाटोबाट अमेरिका पठाउने मानिसहरूबारे जानकारी लिन खोजेको थियो । तर, उनीहरुले प्रहरीसँग त्यति समन्वय नगरेको अधिकारीहरु बताउँछन् । अनुसन्धानमा संलग्न एक अधिकृतका अनुसार, २१ फागुन २०८१ मा डिपोर्ट भएर आएका ८ नेपालीले समेत आफूहरुलाई अमेरिका पठाउने गिरोहबारे सूचना दिएका थिएनन् ।
उनीहरूले प्रहरीलाई जाहेरी दिन समेत मानेका थिएनन् । अमेरिकी राष्ट्रपति डोनाल्ड ट्रम्पले अवैध आप्रवासीविरुद्ध कडा नीति लिँदै आएका छन् । उनीसन् २०२५ को जनवरी २० देखि मे महिनाको अवधिमा १४० जना नेपालीलाई अमेरिकाले डिपोर्ट गरिसकेको छ । अमेरिकाबाट डिपोर्ट हुने नेपालीहरूको संख्या बढ्दो छ ।
जनवरीमा ६, फेब्रुअरीमा २०, मार्चमा ३०, अप्रिलमा २६ र मे महिनामा ५८ जना नेपाली अमेरिकाबाट डिपोर्ट भएको अध्यागमन विभागको तथ्यांक छ ।
