- शुक्रबार, २७ असार, २०८२
काठमाण्डु,५ फागुन– कांग्रेस महामन्त्री गगनकुमार थापाले ‘संघीय शिक्षा ऐन’ तत्काल संसद्मा पेस गर्न सरकारसँग माग गरेका छन।
महामन्त्री थापाले चालु संसद् अधिवेशनबाटै सो ऐनलाई पारित गर्ने आफूहरुको चाहना भएको पनि बताएका छन । शिक्षा पत्रकार समूहले आज शुक्रबार काठमाण्डुमा आयोजना गरेको एक कार्यक्रममा बोल्दै उनले यस्तो बताएका हुन ।
उनले कक्षा ११ र १२ को शिक्षामा अति राजनीतिकरण भएकाले त्यसलाई अनुगमन गर्नका लागि प्रदेशमा ‘शिक्षा लोकपाल’को व्यवस्था हुनेगरी कानुनी व्यवस्था गर्न उपयुक्त हुने बताएका छन ।
संविधानले कक्षा ११ र १२ को शिक्षा पनि स्थानीय तह मातहतमा रहने व्यवस्था गरेको छ। तर, यो अति राजनीतिकरणको शिकार हुने पुगेकाले यसको अनुगमनका लागि प्रदेशमा नै सो लोकपालको व्यवस्था गर्न आवश्यक रहेको महामन्त्री थापाले बताएका छन ।
उनले संविधानले दिएको अधिकार तलमाथि नहुने गरी कक्षा १२ सम्मको शिक्षालाई अगाडि बढाउनका लागि पनि सो लोकपाल प्रदेशमा बनाउने गरी कानुनी व्यवस्था गर्नुपर्ने बताएका छन । उनले भने, ‘ यो पार्लियामेन्टको अहिलेको सेसनमै संघीय शिक्षा ऐन आओस् भन्ने हाम्रो चाहना छ। र, सरकारमा जो साथी हुनुहुन्छ। हामी उहाँहरुलाई त्यही कुरा भनिरहेका छौं।
यो ऐनको अनुसूची बनाउने क्रममा राजनीतिक नेतृत्वले १ दिन पनि छलफल गरेको होइन। कक्षा १२ सम्मको शिक्षा स्थानीय सरकारलाई चलाउन दिने कुरा हामीले संविधानमा नै व्यवस्था गरेका छौं’ तर त्यसलाई संचालन गर्ने काममा अति राजनीतिकरण हुने भयो।
स्थानीय तहका प्रमुख पनि कुनै राजनीतिक पार्टीको हुने भएकाले शिक्षामा राजनीतिकरण हावी हुने भयो। त्यसकारण यसलाई अनुगमन गर्नका लागि प्रदेश सरकारको मातहतमा रहने गरी शिक्षा लोकपालको व्यवस्था गर्न उपयुक्त हुन्छ।’
