उत्तम संजेलकी पत्नीविरूद्व अदालतमा मुद्दा दायर

काठमाण्डु, ५ असार – काठमाण्डुको कुमारीहलस्थित समता अस्पतालकी एक महिला कर्मचारीको रहस्यमय मृत्यु भएपछि हिरासतमा लिइएको अस्पताल संचालककी पत्नीविरुद्ध मुद्दा दायर भएको छ । सरसफाई कर्मचारी विमला तामाङ मंगलबार झुण्डिएको अवस्थामा फेला परेपछि अस्पताल संचालककी पत्नीसहित ३ जनालाई हिरासतमा लिइएको थियो ।

तामाङको मृत्युका विषयमा तीन जना महिलामाथि अनुसन्धान थालिएको हो । प्रहरी परिसर टेकुले आज उनीहरु विरुद्ध अभद्र व्यवहारको मुद्दासहितको फाइल काठमाडौं जिल्ला अदालतमा दर्ता गरेको छ । मृतक विमला तामाङको खल्तीमा भेटिएको सुसाइड नोटमा नाम उल्लेख गरिएकी तीनजना विरुद्ध मुद्दा दायर गरिएको हो । जसमा समता अस्पतालका सञ्चालक उत्तम सञ्जेलकी पत्नी कला संजेलसहित तीनजना छन् ।

नियमित काममा गएकी विमला कार्यालय समयपछि घर नआएको र विगत केही सातादेखि ताला लगाएको कोठामा झुन्डिएको अवस्थामा फेला परेकी थिइन् । विमलाले आत्महत्या गरेको पोष्टमार्टम रिपोर्टबाट खुलेको छ ।

सहमति नभएसम्म शव नबुझ्ने अडान लिएको परिवारले अस्पताल प्रशासनले मृतकका बालबालिकाको पालनपोषणको र दोषी भनिएकाहरुमाथि कारवाहीको विषयमा सहमति गरेपछि उनको दाह संस्कार गर्रिएको छ ।