छठ पर्वले राष्ट्रलाई एकताबद्ध बनाउँछः प्रचण्ड

छठ पर्वका अवसरमा आइतबार शुभकामना दिँदै उनले चुनौतीलाई अवसरमा बदल्न तथा व्यक्तिगत एवं सामाजिक जीवनमा आशाको रक्तसञ्चार भर्न छठ पर्वले सबैलाई प्रेरणा दिने विश्वास व्यक्त गरे । छठले समृद्धिको राष्ट्रिय आकांक्षा पूरा गर्न प्रेरणा मिल्नेसमेत उनले बताएका छन् ।

शुभकामना सान्देशमा प्रधानमन्त्रीले नेपाली समाजमा प्रचलित सबै चाडपर्वमा आफ्नो ऐतिहासिक पृष्ठभूमि र विकासक्रमको संकेन्द्रण पाइने उल्लेख गरेका छन् । छठ पर्व प्रकृति र मानव जीवनबीच जीवन्त व्यवहारिक सम्बन्ध स्थापित गर्ने पर्वका रूपमा समेत स्थापित भएको प्रधानमन्त्रीले बताए ।

मानव जीवन कृषि युगमा प्रवेश गरेपछि उत्पादित कृषिजन्य उपज र परिकारहरूको खुसियाली एवं कृषि युगको निरन्तरताको प्रतीकका रूपमा सूर्यको आरधना गरी छठ पर्वको परम्परा सुरूवात भएको उनले उल्लेख गरेका छन् ।

‘छठ पर्व प्रकृति र मानव जीवनबीच जीवन्त व्यवहारिक सम्बन्ध स्थापित गर्ने पर्वका रूपमा समेत स्थापित छ’, उनले भनेका छन्, ‘यस पर्वले प्रकृति र मानवबीचको सम्बन्ध जीवन्त तुल्याउनका साथै जीवनउपयोगी प्राकृतिक वस्तुहरूको सम्मान एवं संरक्षण, उत्पादन एवं श्रम संस्कृतिको विकासका निम्तिसमेत महत्वपूर्ण भूमिका खेल्दछ ।’

नेपालको संविधानले विविधतासहितको एकतालाई राष्ट्रिय गौरवका रूपमा आत्मसात गरेको उनले बताए । भूगोल र क्षेत्रफलको हिसाबले सानो भएता पनि भाषा, कला, संस्कृति, चाडपर्व, भेषभुषा र सभ्यताका दृष्टिले हामी नेपालीहरू विश्वमै विशाल र वैभवशाली रहेको यथार्थ हाम्रा संस्कार, संस्कृति र ऐतिहासिक तथ्यहरूले राम्रोसँग प्रमाणित गर्ने प्रधानमन्त्रीको भनाइ छ ।

नेपालको संविधानले नेपाली समाजको बहुजातीय, बहुभाषिक, बहुसांस्कृतिक र क्षेत्रीय विशेषतालाई आत्मसात गर्दै विविधतासहितको एकतालाई राष्ट्रिय गौरवका रूपमा आत्मसात गरेको भन्दै उनले शुभकामना सन्देशमार्फत भनेका छन्, ‘छठ पर्वले राष्ट्रिय एकता सुदृढ गर्न, आपसी विश्वास र सम्बन्ध थप प्रगाढ तुल्याउन तथा देशमा विद्यमान चुनौतीहरूमाथि विजय हासिल गर्दै सुशासन, समृद्धि र सामाजिक न्यायसहितको समुन्नतिको मार्गमा अग्रसर हुन हामी सबैलाई प्रेरणा मिल्ने मैले विश्वास लिएको छु ।’