- शुक्रबार, १४ वैशाख, २०८१
डोल्पा, २५ कात्तिक – डोल्पाको फोक्सुन्डो गाविसको रिग्मो गाउँमा अवस्थित नेपालकै गहिरो शे–फोक्सुन्डो तालबाट निस्केको पानीबाट विद्युत् उत्पादन गरिएको छ ।
विश्व वन्यजन्तु कोषको आर्थिक सहयोग र क्यानडा, संयुक्त राज्य अमेरिका डब्लुएफएफको प्राविधिक सहयोगमा पाँच किलोवाट विद्युत् निकालिएको हो ।
तालसम्म पुग्ने हजारौँ विदेशी र स्वदेशी पर्यटकको सेवा सुविधालाई मध्यनजर गरी गत वैशाखबाट विद्युत् उत्पादन सुरु गरिएको निर्माण कम्पनी न्यू इनर्जीले बताएको छ ।
तालबाट निस्केको पानीलाई थुनेर खुलारुपमा जेनेरेटर राखेर विद्युतगृहबिना नै विद्युत् उत्पादन गरिएको छ । नेपालमै नयाँ प्रविधिबाट यस ठाउँमा विद्युत निकालिएको कम्पनीले जनाएको छ । यस जलविद्युत्मा प्रयोग गरिएको जेनेरेटरको जम्मा तौल ३४१ किलो रहेको छ ।
विद्युत उत्पादनपछि ताल वरपरका वस्तीमा उज्यालो छाएको स्थानीयवासी निमा लामाले बताउनुभयो । आजभोलि सो ठाउँमा चौबिसै घन्टा विद्युत् सेवा सुचारु रहेको छ । रासस
