गगनको सिफारिस बदर गर्न सुशिल र देउवालाई उजुरी

काठमाण्डु २७ भदौ–नेपाली काँग्रेसका युवा नेता गगन थापाको काठमाण्डू क्षेत्र नम्बर ४ बाट उम्मेदवारी सिफारिस भएपछि काँग्रेस भित्रैबाट बिरोध भएको छ । थापाले उम्मेदवार बनाउन धम्की दिएको भन्दै पूर्वसभासद् सूप्रभा घिमिरे लगायतले काँग्रेसको जिल्ला कार्यसमिति र केन्द्रीय समितिमा बिरोध पत्र बुझाएका छन । 
थापाको सिफारिसको बिरोध गर्दै पूर्वसभासद् सूप्रभा घिमिरे, प्रतिमा गौतम, विनोद बाबु बस्नेत , श्रीराम लामिछाने , जानु घिमिरे , साधुराम खड्का लगायतले लिखित निवेदन सभापति शुसिल कोईराला र वरिष्ठ नेता शेरबहादुर देउवालाई बुझाएका छन ।
बिरोध पत्रमा क्षेत्रले जिल्ला मार्फत पारदर्शी र समावेशी ढंगले सिफारिस गर्न भनेकोमा त्यसो नगरी छलकपट र व्यक्तिगत पूर्वग्रहराखी अप्रजातान्त्रिक ढंगले क्षेत्रिय कार्य समितिले नियोजित तवरले बहुमतको आधारमा गरिएको भनिएको अवैधानिक एवं अपारदर्शी निर्णय बदर गर्न माग गरिएको छ । पहिले गगन थापालाई काठमाण्डू क्षेत्रनम्बर ४ बाट उम्मेदवार बनाउन क्षेत्रिय सभापति नुच्छेमान ढंगोलले घरघरमा गएर माईनुट गराएपछि त्यसको चर्को विरोध भएको थियो । त्यसपछि सहमतिका लागि बसेको बैठकमा युवा नेता थापाले आफूलाई सिफारिस नगर्ने भए आफूले केन्द्रबाट जे पनि गर्नसक्ने धम्की दिएको विरोधी नेतृ प्रतिमा गौतमले बताइन ।
असन्तुष्ट अर्का नेता श्रीराम लामिछाने भने‘गगनजीले त्यस दिन बिहान भक्तपुरमा आफू चुनावमा नउठ्ने बरु देशभर पुगेर संविधानसभा चुनावमा काँग्रेस उम्मेदवारलाई जिताउँछु भन्नु भएको थियो । तर बैठकमा आएर त्यसको विपरितको कुरा गर्नु भयो । उहाँले आफ्नो एकल नाम सिफारिस नगरे केन्द्रबाट जे पनि गर्नसक्छु भनेर धम्की दिनुभयो । त्यसैले यो निर्णयको हामीले बिरोध गरेका हौं ।’ थापाको नाम सिफारिस प्रति काँग्रेसका पुराना तथा स्थानीय नेता असन्तुष्ट छन । लामो समयसम्म आफूहरुले दुख गर्ने तर पदीय कुरा अरुलाई सुम्पिनु पर्ने बाध्यता भएको उनीहरुको गुनासो छ ।
त्यस्तै समानुपातिकमा पहिलो नम्बरमा सिफारिस गर्न लागिएका पुराना नेता आत्माराम पौडेललाई समानुपातिकको तेस्रो नम्बरमा क्षेत्रिय समितिले सिफारिस गरेको छ । तर उनले यस बारेमा कुनै प्रतिक्रिया दिएका छैनन । पार्टीले उम्मेदवारको विषयमा कुरा नमिलाए थापालाई चुनावमा समेत असहयोग गर्ने उसन्तुष्ट नेताहरुले चेतावनी दिएका छन । यसअघिका संविधानसभा चुनावमा काठमाण्डू क्षेत्र नम्बर ४ बाट काँग्रेस नेतृ सूप्रभा घिमिरे विजयी भएकी थिइन । काँग्रेसका विभिन्न निकायमा काम गरेका र झण्डै ३० वर्षसम्मको राजनीतिक लगानी भएका आत्मराम पौडेल लगायतको अपमान भएको असन्तुष्ट नेताहरुले बताएका छन । क्षेत्रिय समितिले प्रत्यक्षमा गगन बाहेक ३ जनालाई वैकल्पिक र समानुपातिकमा ९ जनालाई सफारिस गरेको छ ।