- बुधबार, १७ असार, २०८३
काठमाण्डू, १७ असार– सत्ता घटक दल राष्ट्रिय स्वतन्त्र पार्टी (रास्वपा)ले पार्टीको निर्वाचन आयोग, लेखा आयोग र अनुशासन आयोग गठन गरेको छ ।
महाधिवेशनपछि पार्टी कार्यालय बनस्थलीमा बसेको रास्वपाको पहिलो केन्द्रीय समिति बैठकले महाधिवेशनबाट अनुमोदन भएको विधान अनुसार पार्टीका तीन वटा आयोगहरू गठन गरिएको रास्वपा महामन्त्री विपिन आचार्यले जानकारी दिए ।
उनले निर्वाचन आयोग र लेखा आयोगको पुरानो संरचना भङ्ग गरी यसअघि नै जिम्मेवारीमा रहेकाहरूलाई पुनः जिम्मेवारी दिइएको बताए । त्यस्तै अनुशासन आयोगको प्रमुखमा उच्च अदालत कास्कीका पूर्वन्यायाधीश समेत रहेका लेखनाथ पौडेललाई मनोनीत गरिएको महामन्त्री आचार्यले जानकारी दिका छन। बैठकमा अन्य पदाधिकारीको मनोनयनको विषयका कुनै छलफल नभएको उनले बताए ।
बाँकी पदाधिकारीको मनोनयन पार्टी सभापतिको विशेषाधिकार भएकाले, सभापतिको निर्देशन र तयारी अनुसार आगामी बैठकहरूबाट अघि बढ्ने उनको भनाइ छ ।
साथै बैठकले पहिलो महाधिवेशनलाई सफल पार्न सहयोग गर्ने तत्कालीन पदाधिकारी, प्रतिनिधि, सदस्य, सुरक्षाकर्मी लगायत सबैलाई धन्यवाद प्रस्ताव पारित गरेको महामन्त्री आचार्यले जानकारी दिएका छन ।
