- बुधबार, १७ असार, २०८३
काठमाण्डू, १७ असार– बालबालिकाहरूलाई पार्टी सदस्यता वितरण भए नभएको सम्बन्धमा यथाशीघ्र विस्तृत जानकारी उपलब्ध गराउन भन्दै सत्ता घटक दल राष्ट्रिय स्वतन्त्र पार्टी(रास्वपा) लाई राष्ट्रिय मानव अधिकार आयोगले पत्राचार गरेको छ ।
रास्वपाले १८ वर्षभन्दा कम उमेरका बालबालिकालाई दलको सदस्यता वितरण गरेको भनी जानकारी प्राप्त भएपछि आयोगले यसबारे विस्तृत जानकारी उपलब्ध गराउन रास्वपालाई आग्रह गरेको हो ।
बालबालिकाहरूलाई पार्टी सदस्यको रूपमा सङ्गठित गरेको भनी प्रकाशित समाचारप्रति गम्भीर ध्यानाकर्षण भएको उल्लेख गर्दै आयोगका सहायक प्रवक्ता श्यामबाबु काफ्लेले बुधबार जारी गरेको प्रेस विज्ञप्तिमा भनिएको छ, ‘पार्टी महाधिवेशनमा प्रस्तुत गरिएको भनिएको प्रतिवेदनमा १८ वर्षमुनिका बालबालिकालाई सो पार्टीबाट सदस्यता वितरण गरिएको भए त्यस्तो कार्य प्रचलित नेपाल कानुन र नेपालको अन्तर्राष्ट्रिय प्रतिबद्धता विपरीत हुने हुँदा उनीहरूलाई पार्टी सदस्यता वितरण भए नभएको सम्बन्धमा यथाशीघ्र विस्तृत जानकारी उपलब्ध गराउन राष्ट्रिय मानव अधिकार आयोग ऐन, २०६८ को दफा २१ (१) अनुसार अनुरोध गरिएको छ ।’
