- शनिबार, २४ जेठ, २०८२
काठमाण्डू, २१ जेठ– माओवादी केन्द्र निकट युवा संगठन योङ्ग कम्युनिस्ट लिग (वाईसीएल) को अध्यक्षमा सहमति नभएपछि इन्चार्ज रामप्रसाद सापकोटा दीपशिखा, अध्यक्ष सुबोध शेर्पाली लगायतका नेताहरू पार्टी अध्यक्ष पुष्पकमल दाहाल प्रचण्ड निवास खुमलटार पुगेका छन् ।
सहमतिमै नेतृत्व टुङ्ग्याउनका लागि दीपशिखा र शेर्पाली प्रचण्डसँग राय लिन खुमलटार गएको स्रोतले जानकारी दिएको छ । अध्यक्ष पदमा पुष्प ओली, केहरसिंह कुँवर, नवराज ऐर र गणेश शाहीले दाबी गरेका छन् । सहमति वा निर्वाचन प्रक्रिया जे भए पनि कुँवर, ओली, ऐर र शाहीमध्ये एकबाट आउने सम्भावना रहेको स्रोतको दाबी छ ।
‘दीपशिखा र सुबोधजी अध्यक्ष प्रचण्डले भेट्न खुमलटार गएका छन् । अध्यक्ष पदका लागि चार जनाले दाबी छोडेका छैनन् । सहमति वा निर्वाचन प्रक्रियाबाट जे भए पनि केहरसिंह कुँवर, पुष्प ओली, नवराज ऐर र गणेश शाहीमध्ये एक जना अध्यक्ष बन्ने सम्भावना देखिन्छ । यद्यपि अहिलेसम्म खुमलटारबाट केही खबर आएको छैन’ स्रोतले भन्यो ।
सहमति नभए निर्वाचन प्रक्रियामा जाँदा दीपशिखा पक्षबाट केहरसिंह र पुष्पमध्ये एक जना अध्यक्षको उम्मेदवार बन्ने सम्भावना रहेको अर्का एक नेताले बताए । अध्यक्ष सुबोधको तर्फबाट नवराज र गणेशमध्ये एक अध्यक्षको उम्मेदवार बन्ने ती नेताले जानकारी दिए ।
