- शनिबार, २४ जेठ, २०८२
धनगढी, २४ जेठ– परराष्ट्रमन्त्री आरजु राणा देउवाले जनताका आवश्यकता र प्रत्यक्ष खाँचोसँग जेडिएका सेवा प्रदान गर्ने काममा राष्ट्रसेवकहरु संवेदनशील बन्नुपर्ने बताएकी छन् ।
राहादानी विभागद्वारा सुदूरपश्चिम प्रदेशका सबै जिल्लाका जिल्ला प्रशासन कार्यालयमा राहादानी सेवामा कार्यरत कर्मचारीहरुका लागि आयोजित अभिमुखीकरण कार्यक्रमलाई आज धनगढीमा सम्बोधन गर्दै उनले सो धारणा राखेकी हुन् ।
‘राहदानी अब नागरिकको कुनै विलासिताको वस्तु नभएर प्रत्येक नागरिकको आधारभूत अधिकार भएको छ । त्यसैले यो सेवा दिने कार्यालयको ‘फ्रन्ट डेस्क’ मा बस्ने यहाँहरु सबैभन्दा जिम्मेवार व्यक्ति हुनुहुन्छ’, उनले भनिन्, ‘सेवाको आवश्यकता र जनताका खाँचोलाई हेरेर गम्भीर भइदिनुहोला ।’
उनले यस्तो संवेदनशील सेवा दिने ठाउँमा बसेका कर्मचारीहरुले नागरिकका समस्या र आवश्यकतालाई पहिलो प्राथमिकतामा राख्नुपर्ने र के कसरी उनीहरुलाई छिटोछरितो र सहज सेवा दिन सकिन्छ भनेर सोच्नुपर्ने सुझाव दिइन् ।
सुदूरपश्चिम तथा यस्तै दुर्गम जिल्लामा दिइने सेवालाई कसरी थप सहज र नागरिकको पहुँचयोग्य बनाउने भन्नेबारे सरकार प्रयासरत रहेको राणाको भनाइ थियो ।
‘राहादानी लिनका लागि पहिलेजस्तो जटिल अवस्था अहिले छैन । तर पनि सेवा प्रदान गर्ने समय र वितरणका क्रममा केही समस्या आउने गरेका मैले सुनेकी छु । सरकारी सेवा जतिसक्दो चाँडै पाइयोस् भन्ने अपेक्षा जनताले राख्नु स्वभाविकै हो’, उनले भनिन् ।
सेवालाई सरल, सहज र पहुँचयोग्य बनाउनु सरकारको कर्तव्य भएको भन्दै उनले त्यसमा कर्मचारीको भूमिका बढी रहने बताइन् ।
मन्त्री राणाले राहादानीसम्बन्धी वर्तमान सेवालाई दुर्गम जिल्लाहरुका नागरिकलाई अझ सहज र पहुँचयोग्य कसरी बनाउने भनेर सरकारलाई सुझाव दिन आग्रह गरिन् ।
पासपोर्टमा जनतालाई परेका समस्या र त्यसमा गर्न सकिने सुधारका लागि सरकारलाई सुझाव दिन पनि उनले आग्रह गरिन् ।
