- शनिबार, २४ जेठ, २०८२
काठमाण्डू, २३ जेठ– गृहमन्त्री रमेश लेखक मुछिएको भिजिट भिसा प्रकरणमा छानबिन प्रक्रिया अगाडि बढाउन सत्तापक्षदलहरु सकारात्मक देखिएका छन । आज (शुक्रबार) संसद् भवन नयाँ वानेश्वरमा भएको प्रमुख प्रतिपक्षी दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र नेपाली कांग्रेसका उपसभापति पूर्णबहादुर खड्का, नेता ज्ञानेन्द्रबहादुर कार्की र प्रमुख सचेतक श्यामकुमार घिमिरेबिच भएको छलफलमा कांग्रेस नेताहरू छानबिन प्रक्रिया अगाडि बढाउन सकारात्मक देखीएको प्रतिक्रिया दिएका छन ।
बैठकपछि सञ्चारकर्मीहरूसँग कुरा गर्दै अध्यक्ष प्रचण्डले कांग्रेस नेताहरू छानबिन प्रक्रिया अगाडि बढाउन सकारात्मक देखिएको जानकारी दिएका छन । ‘भिजिट भिसा प्रकरणमा नेपाली कांग्रेसका नेताहरू छानबिन प्रक्रिया अगाडि बढाउन सकारात्मक देखिनु भएको छ,’ प्रचण्डले सञ्चारकर्मीहरूसँग भने, ‘न्यायिक समिति बनाउने कि संसदीय समिति बनाउने भन्ने विषय टुङ्गिएको छैन ।
अख्तियार दुरुपयोग अनुसन्धान आयोगले छानबिन गरिरहेकाले अदालतमा मुद्दा दायर गर्ने बेलासम्म कुरौँ भन्ने कुरा पनि उहाँहरूको छ ।’ प्रचण्डले प्रतिपक्षी दलहरूले छानबिनको भरपर्दो सरकारको प्रतिबद्धता आएमा आफूहरू संसद्को अवरोध हटाउन सकारात्मक रहेको जानकारी सत्तापक्षलाई दिएको पनि जानकारी दिएका छन ।
कांग्रेस नेता ज्ञानेन्द्रबहादुर कार्कीले संसद्को गतिरोध अन्त्य गर्ने विषयमा प्रमुख प्रतिपक्षी दलका नेता प्रचण्डसँग भएको छलफल सकारात्मक भएको जानकारी दिए । उनले सहमति भइनसकेको तर सहमति हुने चरणमा रहेको पनि बताए ।
