- बिहीबार, २२ जेठ, २०८२
काठमाण्डू, २० जेठ– यातायात व्यवसायीले आन्दोलनका कार्यक्रम फिर्ता लिएका छन् ।
आफूहरुका माग सम्बोधन भएकाले आन्दोलनका कार्यक्रम फिर्ता लिइएको व्यवसायीले बताएका छन् ।
नेपाल यातायात व्यवसायी राष्ट्रिय महासंघका अध्यक्ष विजय स्वाँरले गण्डकी प्रदेश सरकारले राइड सेयरिङ नियमावली फिर्ता लिने निर्णय गरेकाले आन्दोलनका सबै कार्यक्रम फिर्ता गरिएको जानकारी दिए ।
राइड सेयरिङविरुद्ध यातायात व्यवसायीले देशभर सार्वजनिक यातायात ठप्प पारेर आन्दोलनमा उत्रिएका थिए ।
सरकारी कार्यदल र व्यवसायीका प्रतिनिधिबीच गएराति सिंहदरबारस्थित भौतिक पूर्वाधार तथा यातायात मन्त्रालयमा भएको वार्तामा भएको सहमतिअनुसार गण्डकी प्रदेश सरकारले राइड सेयरिङ नियमावलीबाट पछि फर्कन आग्रह गर्न सरकार तयार भएको थियो ।
सहमतिका आधारमा प्रधानमन्त्री तथा मन्त्रिपरिषद् कार्यालयले मंगलबार नै पत्राचार गरेको थियो ।
