- आइतबार, ४ जेठ, २०८२
नवलपरासी, १० पुस–पूर्व–पश्चिम राजमार्गअन्तर्गत नवलपरासीको गैँडाकोटमा बिहिबार भएको सवारी दुर्घटनामा एक जनाको ज्यान गएको छ ।
गैँडाकोट नगरपालिका २ पुल्चोकमा नम्बर नखुलेको सवारी साधनले ठक्कर दिँदा अन्दाजी ४०/४२ वर्षीय एक पुरुषको मृत्यु भएको हो ।
घाइते अवस्थामा फेला परेका ती व्यक्तिको उपचारका लागि भरतपुर अस्पताल लैजाँदै गर्दा बाटोमै मृत्यु भएको इलाका प्रहरी कार्यालय गैँडाकोटका प्रहरी निरीक्षक विनोदविक्रम शाहले जानकारी दिनुभयो ।
मृतकको अझै पहिचान हुन सकेको छैन । दाहिने हात नभएका ती व्यक्तिको विषयमा पहिचान कार्य भइरहेको प्रहरीले जनाएको छ ।
