- आइतबार, ४ जेठ, २०८२
काठमाण्डु, ८ मंसिर – राप्रपा नेपालका अध्यक्ष कमल थापाले माघ ८ मा संविधान जारी नभए त्यसपछि राप्रपा नेपाल देशको पहिलो राजनीतिक शक्तिका रुपमा उदाउने दाबी गरेका छन् ।
नयाँ संविधानमा सनातन हिन्दू राष्ट्र कायम गराउने उद्देश्यले जनमत तयार गर्न मेची अञ्चलका कार्यकर्ता भेटघाटका लागि झापा पुगेका अध्यक्ष थापाले आज बिहान बिर्तामोडमा भएको पत्रकार सम्मेलनमा सो दाबी गरेका हुन् ।
प्रमुख तीन दल सत्ता केन्द्रित फोहोरी खेलमा अल्झिएका कारण माघ ८ मा संविधान जारी हुने कुरामा आफू विश्वस्त नरहेको बताउँदै थापाले राप्रपा नेपालले उठाएका विषय समावेश नभएको संविधान जनताले अस्वीकार गर्ने धारणा समेत व्यक्त गरे ।
नेपाली कांग्रेस र नेकपा एमाले संख्याको गणितीय दम्भ तथा एमाओवादी र मधेसवादी दल पराजयको पीडाले निषेधको राजनीतिमा लागेको आरोप लगाउँदै थापाले समयमा नै संविधान जारी गर्न संविधानसभाको पूर्ण बैठक तत्काल बोलाउनुपर्ने माग गरे ।
उनले आफूलाई अध्यक्षबाट राजीनामा माग्ने पद्मसुन्दर लावती समूहलाई इच्छा भए अर्काे पार्टी खोलेर देखाउन चेतावनी समेत दिए ।
रासस
