- बुधबार, १८ असार, २०८२
मुगु, ७ मंसिर– बिरामी कर्मचारीको हाक्किमले समयमै बिदा नदिँदा उपचार अभावमा ज्यान गएको छ ।
हाक्किमले उपचारका लागि बिदा नदिएका कारण समयमै उपचार नपाउँदा नेपाल विद्युत प्राधिकरण गमगाढ साना जलविद्युत वितरण केन्द्रका कार्यालय सहयोगी जुम्ला घर भएका ४० वर्षीय परेलाल बुढाको ज्यान गएको हो ।
रुघा खोकी र निमोनियाले ग्रस्त भएपछि बुढाले कार्यलय प्रमुख अमित गौतमसँग बिदा मागेका थिए ।
तर दसैं तिहारमा लामो समय बिदामा बसेर आएको भन्दै गौतमले बिदा दिन मानेनन् ।
अवस्था गम्भीर भएपछि उनलाई उपचारका लागि १ मंसिरमा अस्पताल भर्ना गरिएको थियो । उनको उपचारकै क्रममा २ मंसिरमा मृत्यु भएको हो ।
बिदा दिन अस्वीकार गरेका कार्यालय प्रमुख गौतमले बुढा कार्यालयमै ढलेपछि मात्र अस्पताल लान अन्य कर्मचारीलाई भनेका थिए ।
जिल्ला अस्पतालका डा. रणबहादुर बोगटीले अस्पताल आउन ढिला भएका कारण उनको अवस्था गम्भीर रहेकाले बचाउन नसकिएको बताए ।
