- शनिबार, ५ असोज, २०८१
बग्दाद, ११ कात्तिक–इराकको बग्दाद प्रान्तमा सिया मुसलमान समूदायको बाहुल्यता रहेको क्षेत्रमा आइतबार भएको शृङ्खलावद्ध कारबम विस्फोटमा परी मृत्यु हुनेको सङ्ख्या कम्तीमा ४१ पुगेको जनाइएको छ । इराकमा भएको अर्का एक आक्रमणमा २६ व्यक्तिको मृत्यु भएको छ ।
इराकमा भएको शृङ्खलावद्ध आक्रमणहरुमा कम्तीमा ६५ व्यक्तिको ज्यान गएको एएफपी समाचार समितिले जनाएको छ ।
राजधानी बग्दादको छुट्टाछुट्टै दश वटा इलाकामा भएको आक्रमणहरूबाट ११० जना भन्दा बढी व्यक्ति घाइते भएका सुरक्षा र चिकित्सक अधिकारीहरूले जनाएका छन् ।
सो आक्रमणहरु अत्यन्त प्रभावित उत्तरी बग्दादको साआबको छिमेकमा पर्ने इलाकाहरु र बग्दादको बायाआ, बालादियात, मासताल, हुर्रियाद, डुरा र सावा अल– बुरामा रहेका बताइएको छ । एएफपी समाचार समितिको तथ्याङ्कमा आधारित समाचारअनुसार यस बर्षको सुरुदेखि हालसम्ममा इराकमा भएका शृंखलाबद्ध आक्रमणहरुमा ५ हजार तीन सय व्यक्तिको मृत्यु भईसकेको छ ।
त्यसैगरी इराकमा यसै महिनामा मात्र हालसम्म भएका बिभिन्न आतङ्ककारी आक्रमणहरुमा ६५० भन्दा बढी व्यक्तिको मृत्यु भएको अधिकारीहरूले जनाएका छन् ।
अफगानिस्तानमा ११ लडाकूद्वारा आत्मसमर्पण
यसैगरी अफगानिस्तानको पूर्वी भागमा पर्ने नान्र्गाहार प्रान्तमा आइतबार ११ जना सशस्त्र तालिवान लडाकूहरुले आत्मसमर्पण गरेका छन् । एघार सदस्यीय तालिवान सशस्त्र लडाकूले हातहतियारसहित प्रान्तीय उच्चपरिषदका प्रमुख मालिक नाजिरसमक्ष आइतबार आत्मसमर्पण गरेका बताइएको छ ।
अफगान सरकारले अफगानिस्तानमा चलिरहेको द्वन्द्व अन्त्यको लागि शान्ति र मेलमिलाप प्रक्रिया सञ्चालन गर्न ७० सदस्यीय उच्च शान्ति परिषदको गठन गरेको छ । सोही प्रक्रिया अन्तरर्गत गत हप्तामा पनि ४० भन्दा बढी सशस्त्र तालिवान लडाकूले आत्मसमर्पण गरेका थिए । हिजो एघार तालिवानले गरेको आत्मसमर्पणपछि सशस्त्र तालिवानको तर्फबाट कुनै प्रतिक्रिया नआएको जनाइएको छ । एजेन्सी
