- शनिबार, २९ मंसिर, २०८१
रुकुमपश्चिम, १२ भदौ– रुकुमपश्चिममा पहिरोमा परी पुरिएर आमाछोरीको मृत्यु भएको छ ।
आठबिसकोट नगरपालिका–१४ पिपलचौरमा पहिरोमा परी जाजरकोट भेरी नगरपालिका–१ का आमाछोरीको मृत्यु भएको हो ।
मृत्यु हुनेमा ३० वर्षीया बालमती राना र उनकी छोरी दुई वर्षीया प्रतीक्षा रहेको जाजरकोटका प्रमुख जिल्लाअधिकारी रामबहादुर शाहीले काठमाण्डुटुडेलाई जानकारी दिए । बालमतीकै अर्की छोरी १२ वर्षीया तिर्सना घाइते छन् । उनको जिल्ला अस्पताल जाजरकोटमा उपचार भइरहेको छ ।
नलगाड नगरपालिका–१ स्थित माइतीघरमा दर खाएर बालमती छोरीहरुसहित घर फर्कंदै थिइन् । त्यस क्रममा भारी वर्षा भएपछि तीनै आमाछोरी आठबिसकोट–१४ पिपलचौरस्थित छेपारे सामुदायिक वनको भवनमा ओत लागेका थिए । अपराह्न ३ बजेतिर माथिबाट खसेको पहिरोले सामुदायिक वन भत्किँदा च्यापिएर उनीहरुको ज्यान गएको प्रजिअ शाहीले बताए ।
प्रहरी चौकी पुर्तिमकाँडाबाट गएको प्रहरी टोली र स्थानीयले भग्नावशेषमा पुरिएका उनीहरुलाई घाइते अवस्थामा बाहिर निकालेका थिए । तीनै जनालाई जाजरकोट जिल्ला अस्पतालमा लगेकामा दुईको उपचारका क्रममा मृत्यु भएको हो ।
