काठमाण्डु, १२ माघ– प्रदेश–१ बाट राष्ट्रियसभा सदस्यमा सत्ता गठबन्धनका उम्मेदवार गोपाल बस्नेत र एमालेका गुरु बरालले बराबर मतभार प्राप्त गरे ।
बस्नेत र बरालले समान ४ हजार ४ सय ८८ मत प्राप्त गरेपछि गोलाप्रथाको माध्यमबाट विजयी छानिएको छ । गोलाप्रथाबाट बस्नेत राष्ट्रियसभा सदस्यमा निर्वाचित भएका छन् । रिक्त कूल १९ मध्ये प्रदेश–१ मा तीन स्थानका लागि निर्वाचन भएको थियो ।
जसमध्ये सत्ता गठबन्धनबाट नेकपा एकीकृत समाजवादीकी जयन्ती राई र एमालेका सोनाम गेल्जेन शेर्पा निर्वाचित भएका छन् । सत्ता गठबन्धनको मतभार बढी भए पनि गठबन्धनभित्रैबाट अन्तर्घात भएपछि शेर्पा निर्वाचित भएका हुन् ।
गठबन्धनका उम्मेदवार जनता समाजवादी पार्टीका हेमराज राईलाई पराजित गर्दै शेर्पा निर्वाचित भएका हुन् । शेर्पाले ४ हजार ७ सय ५२ मतभार प्राप्त गरे ।
सत्ता गठबन्धनका उम्मेदवार राईले ४ हजार ३ सय ६८ मत पाए । सत्ता गठबन्धनसँग ४ हजार ६ सय ६८, एमालेसँग ४ हजार ५ सय २४ र राप्रपासँग १ सय २० मतभार थियो ।