- बिहीबार, १३ वैशाख, २०८१
काठमाण्डु, १४ कात्तिक–संविधानसभा निर्वाचन सशक्त रुपमा बहिस्कार गर्ने अभियान सञ्चालन गरिरहेको मोहन वैद्य नेतृत्वको नेकपा–माओवादीले एकीकृत माओवादीका वरिष्ठ नेता पराजित गराउन आफू अनुकुलका उम्मेदवारका पक्षमा मतदान गर्न सर्कुलर जारी गरेको खुलासा भएको छ ।
नेकपा–माओवादी एक केन्द्रीय सदस्यका अनुसार काठमाण्डु–१० मा एमाओवादी अध्यक्ष पुष्पकमल दाहाल ‘प्रचण्ड’ विरुद्ध उम्मेदवारी दिएका पदम कुँवरका पक्षमा मतदान गर्न वैद्य नेतृत्वको माओवादीले सर्कुलर जारी गरेको छ । माओवादी कार्यकर्ताका भाई कुँवरले प्रचण्डलाई हराउने भन्दै काठमाण्डु–१० मा स्वतन्त्र उम्मेदवारी दिएका छन् । पदमलाई जस्तै अरु क्षेत्रमा पनि चुनावी समीकरणमा सहयोग पुर्याउने सर्कुलर नेकपा–माओवादी हेर्डक्वटारले जारी गरेको छ ।
पदमले गत वर्ष दसैं, तिहार, छठ र नेपाल सम्वतका अवसरमा एकीकृत माओवादीले भृकुटीमण्डपमा आयोजना गरेको चियापान कार्यक्रममा प्रचण्डमाथि दुव्र्यवहार गरेका थिए । दुव्र्यवहारपछि पक्राउ परेका कुँवरलाई प्रचण्डले नै मुद्दा नलगाउन आग्रह गरेपछि प्रहरीले छाडेको थियो ।
वैद्य माओवादीले पदम कुँवरको पक्षमा तीन हजारभन्दा बढी मत ल्याउने वातावरण बनाउँदा प्रचण्ड पराजित हुने विश्लेषण गरेको छ । यसैका आधारमा केन्द्रबाट सर्कुलर जारी गरेको हो । हिरासतबाट छुटेलगत्तै उनलाई वैद्य माओवादीले फूलमाला लगाएर सहर परिक्रमा गराएको थियो ।
स्रोतका अनुसार कुँवरलाई चुनाव प्रचार खर्चको व्यवस्था पनि वैद्य माओवादीले गरिदिएको छ । पछि उनी आफै नेकपा–माओवादी प्रवेश गरेका थिए । प्रचण्डलाई हराउने र कुँवरका पक्षमा बढी मत खसाल्ने कामको जिम्मा ललितपुर जिल्ला सचिव एवम् कीर्तिपुरका स्थायी बासिन्दा विष्णु महर्जनलाई जिम्मेवारी दिइएको छ ।
उनी वैद्य माओवादीका महासचिव रामबहादुर थापाका पूर्वस्वकीय सचिव हुन् । महर्जनले केही दिनअघि कीर्तिपुरमा प्रचण्डको पोष्टर च्यात्ने कामको नेतृत्व गरेका थिए ।
निर्वाचन प्रक्रियाको अगुवाई गरेका सबै दलका प्रमुख नेता गएको जिल्ला बन्द गर्ने घोषणा गरेको भए पनि वैद्य माओवादीले एमाओवादीलाई केन्द्रित गर्ने नीतिअनुसार प्रचण्ड पुगेको जिल्लामा मात्र बन्द आह्वान गर्दै आएको छ ।
यस्तै वैद्य माओवादीले नेता डा.बाबुराम भट्टराईले उम्मेदवारी दिएको गोरखा–१ र रुपन्देही–४ मा एमाले उम्मेदवारका पक्षमा मतदान गर्न सर्कुलर जारी गरेको छ । एमालेले गोरखा–१ मा रामशरण बस्नेत र रुपन्देही–४ मा सचिव विष्णु पौडेललाई उम्मेदवार बनाएको छ । एमाले अध्यक्ष झलनाथ खनालले बुधवार इलाममा नेकपा–माओवादीले आफनो पक्षमा मतदान गर्ने आशा व्यक्त गरेका थिए ।
बैद्य नेतृत्वको माओवादीले एमाओवादी नेता नारायणकाजी श्रेष्ठले उम्मेदवार दिएको मकवानपुर–२ मा काग्रेस उम्मेदवार जयराम लामिछानेलाई मतदान गर्ने सो पार्टीले योजना बनाएको छ । रोल्पा–१मा कृष्णबहादुर महरालाई पराजित गराउन काग्रेसका लेखनाथ आचार्य र एमालेका हितबहादुर रोकामगरलाई मतदान गराउने योजना बनाएका छन ।
सो पार्टीले बर्दिया–१ मा एकीकृत माओवादीका उम्मेदवार भुवन थारुलाई पराजित गराउन एमाले उपाध्यक्ष बामदेव गौतमको पक्षमा मतदान गर्ने योजना बनाएको छ । गौतमलाई बर्दियामा सो पार्टीका कार्यकर्ताले माला लगाएर स्वागत गरेका थिए । नुवाकोट–३ मा एमाओवादी नेता पोष्टबहादुर बोगटीलाई पराजित गराउन बैद्य नेतृत्वको माओवादीले एमालेका उम्मेदवार नारायण खतिवडाका पक्षमा मतदान गर्ने योजना बनाएको छ ।
एकीकृत माओवादीको उम्मेदवार पराजित गराएर आफना बरिष्ठ नेता जिताउन काग्रेस र एमालेले यसअघि नै गठबन्धन बनाइसकेका छन । काठमाण्डु–२ मा एमाले बरिष्ठ नेता माधवकुमार नेपाललाई जिताउन काग्रेसले कमजोर उम्मेदवारका रुपमा प्रतिमा गौतमलाई उम्मेदवार बनाएको छ । वैद्य नेतृत्वको माओवादीले एमाओवादी नेता लिलामणि पोखरेललाई पराजित गराउन एमाले नेता माधव नेपालको पक्षमा मतदान गर्ने योजना बनाएको छ ।
निर्वाचन बहिस्कारको सोझो अर्थ आफू मतदानमा सहभागी नहुनु, अरुलाई मतदान गर्न रोक्नु भन्ने लाग्छ । तर बैद्य नेतृत्वको पार्टीको केन्द्रीय समितिको निर्णय विपरित व्यक्तिगत ‘इगो’ साध्न यस्तो रणनीति बनाएको बुझिएको छ ।
एकीकृत माओवादीलाई कमजोर नबनाइ आफनो राजनीतिक अस्तित्व जोगाइराख्न नसकिने निष्कर्षका आधारमा सो पार्टीका नेताहरुले त्यस्तो रणनीति बनाएका हुन । सो पार्टीका नेताहरुले त्यस्तो रणनीति बनाए पनि अधिकाश कार्यकर्ताले मतदाता सूचीमा नाम नै लेखाएका छैनन ।
